print preview

Ina plattafurma per tut las infurmaziuns

Alexa Caduff, manadra da la «CoronaComm» grischuna durant la lavur.

Alexa Caduff ha in diplom da Master da la Scola politecnica federala sco microbiologa ed immunologa, enconuscha fitg bain ils virus e lavura dapi il favrer per l'administraziun chantunala dal Grischun. Curt suenter ch'ella è entrada en plazza – cura che las infecziuns cun Covid-19 han cumenzà a s'augmentar l'entschatta da mars – èn ses servetschs stads spezialmain dumandads. Grazia a sias enconuschientschas professiunalas davart ils virus ha ella collavurà a la calculaziun da models da derasaziun. E grazia a questas analisas temprivas ha la regenza grischuna decretà trais dis avant il Cussegl federal las emprimas mesiras da lockdown.

Ma quai n'è anc betg tut: quai che las autoritads chantunalas e federalas decidevan, era mintgamai da communitgar immediat. Danovamain è Alexa Caduff stada en il dretg lieu. En temps ordinaris duai ella lavurar en l'Uffizi da militar e da protecziun civila sco coordinatura per la protecziun da la populaziun; ils ultims trais mais ha ella ussa manà la plattafurma da communicaziun «Coronavirus» en il chantun Grischun. Sia incumbensa: infurmar tut la populaziun davart il stadi da la crisa. «Communitgar a l'intern ed a l'extern è ina disciplina che funcziuna a temp accelerà» – quai sa entant la scienziada da la natira bain scolada.

Invista en il post da communicaziun e la hotline dal chantun Grischun.

Fin 800 dumondas a di

Uss, il cumenzament da zercladur, è tut in pau pli survesaivel: «Il dumber da las dumondas a nossa hotline è sa reducì cleramain», uschia Caduff. La publicitad spetga sin il return dal mintgadi. Ma il cumenzament dal lockdown era la malsegirtad gronda, e mintga di entravan fin 800 dumondas. «Nus ans avain mess la finamira da respunder entaifer in di definitivamain a tut las dumondas che nus survegnivan per telefon u e-mail.» Cun paucas excepziuns è quai reussì.

Per concentrar il grond basegn d'infurmaziun ha il stab directiv chantunal creà entaifer curt temp ina plattafurma d'infurmaziun centrala. In avantatg è stà che la «CoronaComm» grischuna ha pudì sa preparar e s'endrizzar, avant che l'emprima unda da dumondas è arrivada. Temporarmain han communitgà cun la populaziun prest ventg persunas. La plipart da las collavuraturas e dals collavuraturs da la hotline eran commembras e commembers da la protecziun civila; sustegn han els survegnì da giurists da l'administraziun chantunala, da schurnalists independents, da spezialists da communicaziun externs e da translaturs.

Retards mo en singuls cas

Ina particularitad dal chantun Grischun extendì è la trilinguitad. Tenor la lescha da linguas chantunala sto vegnir infurmà uffizialmain en tudestg, rumantsch e talian. Elavurar tut ils texts en trais linguas ed als translatar dovra temp supplementar. En temps normals e planisabels vegniss quai strusch contestà. Durant la crisa da Covid-19 è però stada impurtanta ina communicaziun sperta e transparenta. «La lavur supplementara è stada ina sfida particulara», di Alexa Caduff.

L'incumbensa da la plattafurma da communicaziun grischuna è stada da centralisar ils chanals d'infurmaziun e da sincronisar tematicamain ils cuntegns. Qua èn arrivadas tut las dumondas da la populaziun e da las medias. Ultra da quai ha la plattafurma armonisà internamain tge e co ch'ils uffizis duevan communitgar. En quel connex han ins profità da vias uffizialas curtas. Intschertezzas e malchapientschas han ins mintgamai pudì sclerir spert.

Intervistas regularas cun radio e televisiun

Cunquai che la chadaina d'infurmaziun era lunga, hai dà sporadicamain intschertezzas: «Perquai che las explicaziuns dal Cussegl federal suandavan adina pli tard, avain nus mintgatant pudì communitgar detagls impurtants pir cun retard», di la manadra dal post da communicaziun. A l'entschatta dal lockdown hai en pli dà curtamain ina intschertezza giuridica, a partir da cura precis ch'ils territoris da skis stoppian vegnir serrads. Ins ha però pudì eliminar svelt la discrepanza.

Spezialmain malsegira è stada la populaziun en las valladas grischunas talianas che cunfineschan directamain cun il Tessin e l'Italia. «Perquai avain nus tschertgà il stretg contact cun radio e televisiun», uschia Caduff. Duas giadas l'emna ha il chanal tessinais RSI emess in'intervista cun ina represchentanta dal stab da crisa grischun. In format sumegliant ha RTR surpiglià per rapportar en la quarta lingua naziunala davart ils pli novs svilups en il ticker da corona.

Per Alexa Caduff è l'engaschi da communicaziun temporar gia prest passà. Tar las experientschas positivas tutga la buna collavuraziun ed il grond engaschi da tut las persunas cumpigliadas. Er en ses champ professiunal usità sco microbiologa ha ella pudì emprender bler grazia a l'invista profunda en la superaziun da l'epidemia.